Nagpahayag nin taos-pusong pasasalamat si dating Philippine National Police (PNP) Chief PGen. Nicolas Torre III sa saiyang mga tagasuporta makalihis an biglaang pagkakahali kaini sa puwesto.
Sa iniluwas na video sa saiyang Facebook page, sinaysay ni Torre na an suporta, pangayi, asin man mga mensahe kan publiko an nagsirbing kusog asin inspirasyon kaini sa tahaw kan kontrobersiya.
Siringpaman, pighurot kan dating PNP chief na dae ini pagkahirakan, kundi ituon na sana an malasakit sa mga kababayang pirmeng biktima kan pagbaha na soboot labi na nangangaipuhan nin tabang asin atensyon.
Nilinaw man ni Torre na mayo ining kulog buot ki Presidente Ferdinand Marcos Jr., asin man naiintindihan kaini na parte kan magagabat na desisyon kan Presidente an pagkakasibak sa saiya sa pwesto.
Dugang pa kaini, matinir ining tapat sa sinumpaang tungkulin asin man mapadagos sa pagsirbi komo pulis, alinsunod sa kamawotan kan Presidente asin man kan sambayanang Pilipino.
Marurumdumang si Torre an police general na nasa likod kan high-profile arrests ki dating Presidente Rodrigo Duterte kan nakalihis na bulan nin Marso, asin ki Pastor Apollo Quiboloy kan nakalihis na September 2024.
Antes an nangyari na pagsibak ki Torre komo PNP chief, nagkaigwa nin dae pagkakaintindihan sa pag-ultanan kan PNP asin saiyang administrative boss, an National Police Commission (Napolcom).
Sinibak si Torre sa puwesto kan nakalihis na Martes asin tulos man na pigribayan ni acting PNP Chief LtGen. Jose Melencio Nartatez Jr.
Mientrastanto, pighahalat kan Malakanyang an positibong simbag ni dating Philippine National Police chief Gen. Nicolas Torre III katakod sa alok ni Presidente Ferdinand R. Marcos Jr. na bagong posisyon sa saiya sa gobyerno.
Sa ngunyan kaya, sigun ki Presidential Communications Office Undersecretary asin Palace Press Officer Claire Castro sa press briefing sa Malakanyang mayo pang nareresiber na anumang tataramon an Malakanyang gikan ki Torre.
