Mas pinakusog pa kan Department of Education (DepEd) asin Department of the Interior and Lo cal Government (DILG) an seguridad sa mga eskwelahan sa paagi kan pagtalaga nin mga barangay tanod asin pagpapalawig kan pambansang 911 emergency system sa mga eskwelahan.
Pormal na pinirmahan an joint memorandum circular kan duwang ahensya kan Oktubre 14, na pinangenotan ninda Education Secretary Sonny Angara asin Interior Secretary Jonvic Remulla, kasabay kan sarong school safety audit asin emergency drill sa Bangkal High School sa Makati City.
Sa irarom kan kasunduan, igwa na nin kakayahan an mga eskwelahan na makipag-ugnayan sa saindang lokal na barangay tanganing humagad nin tabang sa mga tanod para sa pagmantener kan kaayusan asin seguridad sa laog asin palibot kan mga pasilidad kan eskwelahan.
Mientrastanto, piglinaw kan DepEd na an mga barangay tanod dai masirbing karibay kan mga awtoridad kan eskwelahan o kan mga alagad kan ley, kundi masirbi sana bilang suporta
.Masairarom man an mga ini sa sarong oryentasyon tanganing masiguro na nasusunod an gabos na patakaran sa pangangataman kan mga aki, karapatan kan mga estudyante, asin an pangkagabsan na kaligtasan sa eskwelahan.
Dugang pa sa pagdugang nin mga katuwang sa seguridad, isasabay man an DepEd sa unified 911 emergency system kan DILG, sa tabang kan technology firm na NGA Philippines.
Sa paagi kan sistemang ini, sabay na maririsebe kan Philippine National Police (PNP) asin DepEd an mga report nin emergency, na maparikas sa pagresponde asin koordinasyon kan duwang ahensya.
An mga insidente maagi man sa validation kan mga opisina kan DepEd sa central, regional, asin schools division levels, tanganing masiguro an tamang impormasyon.
Segun sa NGA Philippines, obheto kaini na paliputon an proseso na dati nag-aabot nin pirang semana tanganing matapos sa laog sana nin sarong aldaw, mantang sentralisado an pagkalap kan impormasyon.
An DILG an naglansar kan unified emergency hotline kan Setyembre 2025, na an katuyuhan iyo na pagsararoon sa sarong serbisyo an labi sa 30 lokal na emergency hotline sa bilog na nasyon.
An importanteng lakdang na ini katuyuhan na pakusugon an mga mekanismo sa pagresponde sa mga insidente nin karahasan, pambabadil, asin iba pang seryosong huma sa kaligtasan kan mga estudyante asin kawani kan mga eskwelahan.
Sa pagkakasararo kan DepEd asin DILG, mas masisigurong an mga eskwelahan bilang ligtas na lugar para sa pakanood asin pagtalubo kan mga estudyante.
