Pig-anunsyar kan Department of Education (DepEd) na tatawan nin hasta 30 aldaw na bakasyon an mga paratukdo.
Sigun sa ahensiya, ini an basado sa updated guidelines na nagtutugot sa mga paratukdo na i-schedule an saindang 30 aldaw na uninterrupted break sa tahaw kan April 16 asin June 1, 2025, pwedeng magkakasunod o staggered basis.
Kaibahan man sa matatawan nin katampad kan sarong bulan na bakasyon an Alternative Learning System (ALS) teachers asin an mga nagtutukdo kan Arabic Language and Islamic Values Education (ALIVE) classes.
Piglinaw kan DepEd na dae obligado an mga paratukdo na makiparte sa anuman na aktibidad na igwang kinaaraman sa Performance Management Evaluation System (PMES) mantang sinda an nakabakasyon.
Pwede nindang kumpletuhon asin isumiter an saindang electronic Individual Performance Commitment and Review Form sa katapusan kan enot na bulan kan School Year 2025-2026, mantang an mga naga-apply para sa promotion an pwedeng magsumiter nin performance evaluations antes an huring aldaw kan klase.
Boluntaryo man an pagbali sa professional development activities o summer training asin gabos kan paratukdo na makikiparte digde an makakaresebir nin Vacation Service Credits apwera pa sa 30 aldaw na limit.
Tutugotan man an mga paratukdo na makiparte sa mga aktibidad sa May 2025 elections asin sports event sa kasagsagan kan saindang bakasyon.
Dae man kaibahan sa vacation benefits an mga school heada huli ta sinda an responsable sa pamamayo sa eskwelahan sa kasagsagan kan bakasyon alagad entitled pa man sinda para sa vacation asin sick leave credits sa nasambitan ng period.
Mientrastanto, sa sarong statement, sinaysay ni Education Sec. Sonny Angara na sarong well-deserved opportunity an break na iki sa mga estudyante asin sa mga paratukdo tanganing makapag-relax makalihis an halabang academic year.
