NAGA CITY – Pigtawan-duon kan Director kan Civil Service Commission – Camarines Sur an kagayonan kan pagigin pasado sa Civil Service Examination.
Sa entrevista kan Bombo Radyo Naga ki Ma. Dolores Detera Salud, Director II, Civil Service Commission – CamSur, sinaysay kaini na kun an sarong indibidwal an pasado sa nasambitan ng eksaminasyon, mayo ining validity boot sabihon habambuhay ini magagamit asin magigin permanente ini sa anuman na aapplyan na posisyon sa gobyerno.
Dugang pa kaini, enkaso man na matawan nin posisyon sa anuman na government agencies dae ini basta-basta mahahali huli man ta permanenteng posisyon an naitao siring man igwang kaakibat na eligibility.
Sigun pa ki Salud, an eligilibity na ini an dae kaipuhan i-renew bakong siring kan ibang eligibility siring kan PRC na kadakol mga dokumentos na kinakaipuhan sa pag-renew, kaya man kun an sarong indibidwal an natawan nin certificate of eligibility kan CSE lifetime na soboot ini magagamit.
Pigtawan-duon pa kaini na ngunyan na taon, dae maabot sa 6,000 an numero kan mga ma-exam asin sarado sa 5,000 an numero sa maabot na 2026 kun saen an filing kaini sa maabot man na bulan kan Nobyembre.
Mientrastanto, ipigheras pa kan opisyal na sa mga nagfa-file sa pag-exam igwa soboot nagkapira na mga nagba-back out asin dae nakakaabot tuyong aldaw na kan eksaminasyon huli man sa dae maaraman na rason kun saen nag-aabot sa labi 200 na indibidwal an dae nakakapag-exam.
Sa ngunyan, pagiromdom na sana ni Salud orog na sa mag ma-exam ngunyan na bulan kan Agosto, siertuhon soboot na preparado an mga dadarahon na dokumentos tanganing dae na magkaproblema sa aldaw man kan eksaminasyon, siring man antes an nakatalaang oras kan pag-exam dapat yaon na sa venue.
