Matao an Department of Migrant Workers (DMW) nin suporta sa dating overseas Filipino worker na si Mary Jane Veloso, kaiba an psychological asin livelihood assistance, matapos na tawan siya kan Malacañang nin absolute pardon.
Segun ki Palace Press Officer Undersecretary Claire Castro sa sarong press briefing, kabtang kan padagos na interbensyon kan DMW an pagtao nin psychosocial counseling, livelihood starter kits, kapital para sa pagnenegosyo, asin skills training.
“Tiniyak ng ahensya na patuloy ang mga hakbang nito upang masiguro ang maayos na reintegration ni Mary Jane at ng kanyang pamilya sa panibagong yugto ng kanilang buhay,” dugang pa ni Undersecretary Claire Castro.
Mantang, itinao kan Department of Social Welfare and Development (DSWD) Field Office 3 an ₱30,000 cash assistance ki Veloso. Nakakua man nin ₱10,000 an saiyang mga magurang, mantang ₱30,000 man an itinao para sa saiyang mga aki.
Mainit man na sinabat si Veloso kan saiyang mga paryente asin haraning amigo sa saiyang pagbalik sa Barangay Burol, matapos an 16 na taon.
Narurumdoman na hinusgaran kan District Court of Justice of Sleman sa Yogyakarta, Indonesia, si Veloso nin parusang kagadanan kan Oktubre 11, 2010. Tulos man na nag-apela an dating Presidente Benigno Aquino III para saiya.
Iginiit ni Veloso na siya inosente asin dai niya aram na ginamit siya bilang tagadara nin ilegal na droga.
