Pigtawan-duon ni Department of National Defense (DND) Secretary Gilberto “Gibo” Teodoro Jr. an importansya kan pagrespeto sa internasyonal na ley asin an pagpakusog kan kooperasyon sa seguridad sa ginibong 13th ADMM-Plus sa Lapu-Lapu City, Cebu, kan Oktubre 29, 2026.
Sa saiyang diskurso sa atubangan kan mga representante hale sa ASEAN asin sa mga dialogue partners kaini, ipinahayag kan kalihim an tulong pangenot na prayoridad tanganing maisulong an katuninongan, katatagan, asin seguridad sa rehiyon kan Indo-Pacific.
Kaiba sa mga prayoridad na ini an mahigot na pagtubod sa United Nations Charter asin 1982 United Nations Convention on the Law of the Sea (UNCLOS), pagpakusog kan maritime security cooperation, asin an pagprotehir sa mga migrant workers asin seafarers sa tahaw kan mga internasyonal na krisis.
Ginibo man kan kalihim an oportunidad tanganing ipanawagan an pagkaburonyog kan mga nasyon sa pagseguro kan food security asin energy security kontra sa mga huma asin hamon sa global supply chain.
Idiniin ni Teodoro an krusyal na papel kan international community sa pagprotehir sa kapakanan kan mga Overseas Filipino Workers (OFWs) asin mga marino na igwang dakulang kontribusyon sa internasyonal na ekonomiya, orog na sa panahon kan mga armadong iriwal asin mga emergency sa manlaen-laen na nasyon.
Ginibo an nasabing pagtiripon sa Cebu bilang parte kan padagos na pagho-host kan Pilipinas sa mga serye kan halangkaw na lebel nin pag-urulay kan ASEAN ngunyan na taon.
Nagsirbing venue an probinsya para sa pagtiripon kan mga defense ministers asin security leaders hale sa sampulong nasyon kan rehiyon asin kan saindang mga pangenot na dialogue partners arog kan United States, China, asin Japan.
Katuyuhan kan mga pagtiripon na ini na pakusugon an diplomasya asin pag-ulayan an mga mainit na isyung geopolitikal arog kan seguridad sa West Philippine Sea asin an katuninongan sa bilog na Indo-Pacific.
