Mahigpit na nagbabala ang Department of Energy (DOE) sa mga kumpanya ng langis na huwag ipatupad nang paunti-unti o staggered ang nakatakdang malakihang rollback sa presyo ng mga produktong petrolyo na magsisimula bukas, Nobyembre 10.
Ayon sa ahensya, maaaring patawan ng show-cause order at isailalim sa masusing inspeksyon ang mga oil company na hindi susunod sa nasabing direktiba.
Narito ang inaasahang bawas-presyo sa kada litro:
- Gasoline: ₱16.80
- Diesel: ₱4.10
- Kerosene: ₱3.70
Matapos ang rollback, inaasahang magiging ganito ang presyo ng mga produktong petrolyo:
- Gasoline: ₱71.48 kada litro
- Diesel: ₱89.69–₱94.20 kada litro
- Kerosene: ₱121.35 kada litro
Ipinaliwanag ng DOE na ang malaking pagbaba ng presyo ay bunsod ng paghina ng pandaigdigang presyo ng langis, kasunod ng pagluwag ng tensyon sa pagitan ng Estados Unidos at Iran.
Binigyang-diin naman ni DOE Undersecretary Alessandro Sales na hindi pinahihintulutan ang staggered implementation ng price reduction dahil ito ay direktang kautusan ng ahensya. Dagdag pa rito, nananatiling umiiral ang state of calamity sa gitna ng patuloy na tensyon sa Middle East.
