Pinahigot kan Department of Energy (DOE) an pagsusuri kaini sa kamugtakan kan suplay kan kuryente sa mga isla asin off-grid sa nasyon komo kasimbagan sa kasuguan ni Presidente Ferdinand Marcos Jr., na siertuhong pantay-pantay asin abot-kaya an access sa lambang Pilipino sa kuryente.
Kasuarin sana, nagsagibo nin assessment an DOE sa Camotes Island, Cebu makalihis makaresebir nin report kan madalas na brownout.
Sigun ki DOE Assistant Secretary Mario Marasigan, kaparehas ini sa mga problemang naeeksperyensiyahan sa Siquijor na kulang sa kapasidad kan power generation asin distribution.
Sa presente kaya an Camotes Island an pigsusuplayan kan Camotes Island Power Generation Corporation (CAMPCOR) gamit an diesel generators. Alagad an single-phase distribution system kan Camotes Electric Cooperative, Inc. (CELCO) an dae bastante tanganing maihatod nin marhay an kuryente, rason tanganing magdalas an aberya kan suplay kan kuryente sa lugar.
Dugang pa kaini, an pag-deliver kan diesel an nagigin problema man orog na sa panahon kan bagyo, na iyong nagpapauktaba sa paghahatod kan fuel gikan sa Cebu.
Huli digde, nahiling kan DOE an pangangaipuhan para sa mas matatag asin mas sustainable na solusyon siring kan hybrid renewable energy system, solar panels na igwang battery storage, asin energy efficiency measures.
Dugang pa kan ahensiya na obheto kan inisyatibong ini na dae sana simbagan an presenteng problema kan nasyon kundi maglatag nin panghaluyang solusyon sa sektor kan enerhiya sa mga hararayong komunidad sa Pilipinas.
