Kinalampag kan mga kawani kan Department of Health (DOH) an Office of the Ombudsman tanganing imbestigaran an BID-Rigging asin iba pang katiwalian sa laog kan ahensya, katakod soboot kan panghihimasok sa procurement process para sa 150 units kan Mobile Primary Care Facilities na nagkakantidada nin ₱12 milyon kada saro.
Sa reklamong pigsunad, kahagadan kan mga empleyado an tolos na pagsusuri kontra ki Health Secretary Teodoro Herbosa, Head Executive Assistant Atty. Brigida Romualdez-Aquino, asin Executive Assistant VI Allan Tope huli soboot sa pagmamanipula kan bidding, sarong pagbalgar sa Anti-Graft and Corrupt Practices Act.
Sigun sa reklamo, an tolong opisyal dae parte kan Bids and Awards Committee (BAC) asin “mayong awtoridad alagad pauro-utro na nakikiaram” sa procurement para sa supply, delivery, testing, asin commissioning kan nasambitan na Mobile Primary Care Facilities.
Pigpunto man kan nagrereklamo na pigriribayan soboot ni Secretary Herbosa, sa paagi kan saiyang executive assistant na si Tope, an Terms of Reference (TOR) asin sinabi na sunudon an saindang binilog na bersyon.
Dugang pa, dae man end-user kan mga babakalon na sakayan an tolong opisyal kun kaya mayo ining teknikal na basehan tanganing baguhon an specifications na pagbalgar soboot sa New Government Procurement Act.
Pigtawan duon kan mga kawani na an End-User Unit sana an may kapangyarihang magbilog kan technical specifications, asin an BAC an igwa sanang mandato para magsuri kaini. An panghihimasok kan tolong opisyal indikasyon soboot kan “undue influence” tanganing magpabor sa sarong partikular na supplier.
Sigun pa sa reklamo, nagkawsa na man nin takot asin pangamba sa rank-and-file employees an panggigipit, kaya hinagada sa Ombudsman na ipataw an preventive suspension ki Herbosa, Aquino, asin Tope.
Tinawan duon pa man na an pagsasagibo kan forensic examination asin preservation kan procurement records kairiba an TOR drafts, evaluations, email exchanges, asin text messages tanganing malikayan soboot an posibleng pag-delete o pagmamanipula kan ebidensya.
Sinabi man kan mga complainant, mawot nindang magtinir na confidential an saindang pagkakabisto huli sa pangamba na sinda ma-retaliate o pag-initan kan mga sangkot na opisyal.
Dugang pa ninda, sa ibong kan mga isyu asin depekto sa mga naenot na equipment na pig suplay kan parehong contractor, pigpipirit pa man kan nagkapirang opisyal na sa nasambitan na supplier liwat gikan an mga bagong unit.
Para sa sainda, malinaw ining indikasyon kan pagpabor sa sarong supplier sa kaiba
