Pinabulaanan kan Department of Health (DOH) an urulay-ulay na riribayan si Secretary Ted Herbosa sa tahaw kan mga isyung nagpapatos sa ahensiya.
Sigun mismo sa sekretaryo, mayong katotoohan an nasambitan na pagriribay nin liderato sa kagawaran asin sinabi na man soboot ni Palace Press Officer USec. Claire Castro na mayong balasahan sa mga miyembro kan Gabinete.
Alagad, nakapreparar naman si Sec. Herbosa na tanggapon an desisyon kan Presidente enkaso magpasyang ribayan ini dahil nasa prerogatibo ini kan punong ehekutibo.
Pigtawan-duon kaini na gabos sinda sa Gabinete nagseserbe sigun sa kamawotan kan Presidente.
Sa ibong man kan mga urulay asin isyu sa DOH, pighayag ni Sec. Herbosa na ipapadagos ninda an pagpapautob sa mga direktiba kan Presidente siring kan implementasyon kan zero-balance billing sa DOH-accredited hospitals para sa mas pinahusay pang pag-aataman sa salud kan gabos na mga Pilipino.
