Nakapreparar an lado kan Department of Justice (DOJ) na isairarom sa state witness program an government contractors na sinda Curlee asin Sarah Discaya enkaso man na mapatunayang bakong “most guilty” an mga ini sa soboot anomaliya sa flood control projects.
Kinumpirmar ini ni Senate Blue Ribbon Committee chair Senator Rodante Marcoleta sa pagpapadagos kan motu propio inquiry kan Senate Blue Ribbon sa soboot korupsiyon sa flood control projects ngunyan na Lunes, Setyembre 8.
Sa nasambitan ng pagdinig, pighapot ni Senate Committee vice chair Senator Erwin Tulfo si Senate Committee chair Marcoleta sa plano kan komite dapit sa idinulog kan mag agom na Discaya katakod sa huma sa saidnang buhay.
Naenot na kayang pigbuyagyag ni Sarah Discaya sa saiyang sworn statement na “huli sa peligro kan buhay sa saindang pamilya, napiritan sindang makisumaro sa kalakaran dawa na labag sa saindang sadiri.”
Huli man kaini, nagboluntaryo an Discayas na magin state witness tangani ibuyagyag an soboot na sabwatan sa pag-ultanan kan mga lehislador, Department of Public Works and Highways (DPWH) asin iba pang kawani kan gobyerno tangani gibuhon kun ano an tama.
Umapelar man an mag agom ki Sen. Marcoleta asin Presidente Ferdinand Marcos Jr. sa pag-protektar sa saindang pamilya.
Sigun man ki Sen. Marcoleta, tulos ining nakipag-koordinar sa opisina ni Justice Secretary Jesus Crispin Remulla pagkaresiber kan sinumpaang salaysay kan mag agom na Discaya.
Ipinaabot ni Sec. Remulla na dae dapat mahadit an mag-agom na Discaya huli ta igwa nin provisional immunity an mga ini asin man bakong basta na sanang imbestigaran.
