Nagpagirumdom an Department of Labor and Employment (DOLE) sa mga employer na siertuhon na tama an pasuweldo sa mga obrero na naka-duty ngunyan na Bonifacio Day.
Sa Labor Advisory No. 13, pig-enkaminar kan DOLE an mga kumpanya na magsunod sa nakatalaang patakaran tanganing mamantinir an makatarungang labor practices asin maproteheran an karapatan kan mga obrero sa pagselebrar kan regular holiday.
Sigun sa guideline, kun dae malaog an sarong empleyado ngunyan na holiday, dapat pa man ini bayadan kan 100 percent kan aldawan na sahod, basta nakalaog ini o naka-leave with pay kan aldaw na naenot sa holiday.
Para man sa mga obrero ngunyan na Bonifacio Day, nakapalaman na dapat bayadan sinda nin bilog na 200 percent kan saindang sahod para sa enot walong oras kan trabaho. May dugang na 30 pecent pa an dapat itao kun lampas sa walong oras an duty.
