Nagpagirumdom sa mga employer an Department of Labor and Employment (DOLE) na bayadan nin tama an saindang mga trabahador durante kan duwang non-working days asin sarong regular holiday sa Nobyembre 2026.
An nasyon mag-oobserbar kan All Saints’ Day sa Nobyembre 1 asin All Souls’ Day sa Nobyembre 2, na parehong special non-working holidays, mantang an Bonifacio Day sa Nobyembre 30 sarong regular holiday.
Segun sa Labor Advisory No. 18, series of 2026, an mga empleyadong nagtrabaho kan Nobyembre 1 asin 2 makakaresibi nin dugang na 30% kan saindang basic wage para sa enot na walong oras.
An prinsipyo na “no work, no pay” an ipapautob sa mga dai nagtrabaho sa nasabing mga petsa, apwera kun igwa nin paborableng company policy practice o collective bargaining agreement na nagtatao nin bayad sa sarong special day.
Para sa Bonifacio Day, an mga empleyadong nagtrabaho makakaresibi nin 200% kan saindang wage para sa enot na walong oras.
Kun an empleyado dai nagtrabaho sa Bonifacio Day, babayadan pa man giraray sinda nin 100% kan saindang wage para sa aldaw na idto, basta nagreport sa trabaho o naka-leave na may bayad kan aldaw tulos bago an regular holiday.
May dugang na bayad man para sa overtime asin kun an trabaho nagtama sa rest day kan empleyado durante kan mga holidays na ini.
