Napag araman kan mga awtoridad na may kargang military ammunition an Ukrainian cargo aircraft, na inot na iniulat na may nakakabit na military-grade explosives sa Leipzig/Halle Airport.
Segun suboot ini sa sarong confidential police report.
Sinabi man sa mga ulat na nakumpirma kan mga forensic expert na an pagpasabog na nakakabit sa drone ay sarong high military grade.
Segun pa sa mga dae pinangaranang imbestigador, na kaya suboot dae sumabog an drone nin huli nagka igwa nin technical defect sa explosive device kaini.
Huli digdi, mas pinakusog an isinasagibong counterterrorism investigation sa Leipzig/Halle Airport, na nagseserbe komo pangenot na cargo hub asin NATO military logistics center sa Germany asin tigtuturing na parte kan country’s critical infrastructure.
Segun kay German Interior Minister Alexander Dobrindt, an insidente ay matuturing na sarong “hybrid attack” na nagpapahiling kan naglalangkaw na peligro sa seguridad kan bansa.
Nakatakda man siyang makipagpulong sa mga opisyal hali sa Baltic states, Poland, Sweden, Norway, Denmark, asin iba pang bansa sa katapusan kan Agosto nganing pag ulayan an pagpapakusog kan saindang militar.
Padagos mang inaaram kan mga awtoridad an iba pang detalye kan insidente. Hinahanap pa man ninda an mga debris kan sarong dae pa napag aaraman na bagay na tumama man sa saro pang cargo aircraft.
Nainot nang iniulat na an drone suboot nakua harani sa pirang Ukrainian Antonov An-124 cargo aircraft, na kabali sa pinakadarakulang cargo planes sa mundo.
Nahiling man kan sarong mamamahayag kan Reuters an mga pulis na naghahanap nin ebidensya harani sa saro sa mga eroplano.
Mienstratanto, an cargo aircraft na tinamaan kan dae pa nabibistong bagay ay nagsasagibo nin go-around maneuver huli sarado an saro sa mga runway kan airport. May diit ining naraot alagad ligtas na nakalapag sa Hanover sa Germany.
Huli sa insidente, paramientas na sinuspinde an operasyon sa Leipzig/Halle Airport asin inilihis an pirang flight, kabali an mga eroplano kan DHL.
Segun man, sinabi kan pamunuan kan airpoirt na normal na giraray an operasyon.
Sa ngunyan, dae pa nabibisto an suspek.
