Ikinalugod ni House Deputy Speaker asin Zambales Rep. Jay Khonghun an pagkaaresto ki Atty. Levito Baligod asin 14 na miyembro kan grupong inaapod na “maleta boys,” asin nagpahayag nin pagtitiwala sa sistema nin hustisya tanganing maresolbar an mga akusasyon na iginapo kontra sa nagkapirang opisyal kan gobyerno.
Inaresto an grupo kan Biyernes, Oktubre 16, sa San Juan Hall of Justice sa bisa kan mga warrant na ipinaluwas kan Regional Trial Court Branch 69 sa Iba, Zambales. Nahahampang sinda sa kasong unjust vexation kaugnay kan Cybercrime Prevention Act.
Nag-ugat an kontrobersiya sa mga akusasyon nin suboot paghahatod nin mga maleta na pano nin kwarta sa nagkapirang opisyal kan gobyerno na may koneksyon sa mga kwestyonableng flood control project. Marigon na pinagpabulaanan ni Khonghun an saiyang pagkasangkot sa nasabing mga akusasyon.
Segun sa mambabatas, bakong pagbalos kundi pagdepensa sa saiyang pangaran, pamilya asin dignidad an rason kan pagpasangat niya nin kaso laban sa mga nag-akusa saiya.
Idinugang man ni Khonghun na an pagtao nin warrant of arrest bakong nangangahulugan nin pagkakasala, huli ta an korte pa man giraray an magdedesisyon base sa ebidensya asin sa presenteng ley.
Tig-enkaminar niya na dai isali an bilog na Philippine Marine Corps sa kontrobersiya, asin idinugang na an paninimbagan kan mga indibidwal dai dapat makaapekto sa reputasyon kan mga soldados na matapat na naglilingkod sa nasyon.
