Iginiit liwat kan mga parasira sa Zambales an saindang hinaing manungod sa kawaran nin talingkas na pangingisda sa Bajo de Masinloc o Scarborough Shoal.
Segun ki Zambales Rep. Doris “Bing” Maniquiz, nabuhay liwat an saindang pagkadismaya matapos na magluwas sa impeachment trial ni Bise Presidente Sara Duterte an report manungod sa P319.33 milyong remittance na naresibe kan Cale88 Foods Corp., sarong kumpanyang iniuugnay sa agom kaini na si Atty. Manases Carpio.
Sinabi ni Maniquiz na pauru-utro nang inako kan mga mparasira an paghanap nin ibang pasiraan huli sa takot sa mga insidente nin pananakot kan mga barkong Tsino, kaiba an paggamit nin water cannon.
Alagad, huli sa isyu kan remittance, kinukwestyon ninda liwat kun tano ta nasasakitan an mga Pilipino na makalaog asin mangisda sa kadagatan na haloy na nindang ginikanan nin kabuhayan.
Segun sa mambabatas, dati sagana sa sira an Bajo de Masinloc asin harani sana ini sa Zambales. Sa laog nin saro o duwang aldaw, napapapano nin huri an darakulang bangka kan mga parasira. Ngonyan, sabi ninda, igwa nin darakulang barkong Tsino sa laogan kan lugar na naghahadlang sa sainda.
Gusto kan mga parasira na maipaliwanag an naiulat na mga transaksyon kan Cale88.
Nagpromesa man si Maniquiz na mahagad siya nin congressional inquiry sa pagbalik kan sesyon sa Nobyembre tanganing maaraman an tunay na nangyari asin matugunan an haloy nang hinaing kan mga komunidad.
Naglalaom man an mga parasira na matatalakay an saindang sitwasyon sa nakatalaan na pag-urulay ni Pangulong Ferdinand “Bongbong” Marcos Jr. asin kan mga representante kan China.
Mientrastanto, sinabi ni Maniquiz na nag-alok an mga lider kan Kamara nin tabang sa kabuhayan sa paagi kan pagtao nin 60 payao o aparatong nagaakit nin mga sira tanganing mapadali an pangingisda harani sa baybayon.
