NAGA CITY- Padagos an pag-enkaminar kan Department of Trade and Industry Camarines Sur sa mga establishments na magsunod sa price guide para sa school supplies tanganing malikayan an posibleng sanctions asin penalidad.
Sigun sa ahensiya na nagpuon naman sinda na magdestrebwer nin price guide kan mga nakalihis na aldaw sa mga darakulang establishments sa probinsiya antes na magpuon an klase para sa school year 2025-2026 sa June 16.
An nasambitan ng price guide an basado sa agreement na ginibo kan DTI asin kan manufacturers/distributors kan school supplies sa irarom kan Fair Trade Act tanganing masierto na malilikayan an overpricing kan items.
An price guide pa na ini an makakatabang para sa mga consumers na madertima asin maghanap nin tindahan na nagpapabakal nin school supplies sa baratong presyo.
An guide na ini sakop an notebooks, writing pads, pencils, ball pens, crayons, erasers, sharpeners, rulers asin iba pa.
Makundusir man an DTI nin inspection antes an pagbubukas kan klase tanganing madetermina kun an mga school supplies na pigpapabakal an nakakasunod sa pigtalaan na presyo.
An mga mabayolar man sa nasambitan ng price guide an mahahampang sa magkakanigong penalidad.
