Pigsierto kan Palasyo an pagtatao nin ‘due process’ sa PrimeWater sa tahaw kan imbestigasyon sa mga reklamo katakod kan soboot dae marhay na serbisyo kan kompanya sa pirang parrte kan nasyon.
Sinaysay ni Palace ress Officer Usec. Claire Castro na padagos an imbestigasyon kan Local Water Utilities Administration (LWUA) mapadapit sa mga reklamo, asin anuman na suporta gikan sa manlaen-laen na sektor an pigkokonsiderar na patunay na seryoso an administrasyon sa pagsimbag sa isyu.
Ginibo ni Castro an pahayag kasunod kan pormal na reklamong pigsunad kan grupong Bayan Muna na nangangapodang ipawarang-bisa an gabos kan joint venture agreements (JVA) kan PrimeWater sa mga local water districts.
Sa mga hapot kan media ku bukas an Palasyo sa pangapodang ini, pigtawan-duon ni Casto na an Presidente asin administrasyon an nagtutubod sa ‘due process’ asin kontra soboot ini sa ideyang ‘cut the process.’
Sigun pa ki Castro, pigkakarkulong nasa 16 milyong katawo an apektado kan soboot palpak na serbisyo kan PrimeWater, rason tanganing tulos ining aksyunan.
Siring man, pigtawan-duon ni Castro na dae pwedeng basta-basta magluwas nin desisyon nin mayong bastanteng batayan.
