Pig-aprubahan na kan Department of Budget and Management (DBM) an 4,000 dugang na posisyon sa Philippine Coast Guard (PCG).
An ribo-ribong bagong posisyon an pigbibilog kan 819 PCG Officers asin 3, 181 non-officers.
Huli sa dugang na apat na ribong bagong posisyon, magkakaigwa na an PCG nin kabilogang 43, 430 personnel asin officials gikan sa presenteng trayntang ribo.
Sinaysay ni Budget Secretary Amenah Pangandaman na an dugang na mga personnel an tanganing mapakusog pa an operational capability kan PCG, sa tabang kan kadakol na manpower.
Kinabibilogan ini kan mas marahay na maritime safety administration, marine environmental protection, maritime security and law enforcement asin maritime search and rescue.
Naglalaom man an DBM na an dugang na 4,000 personnel kan PCG an magpapakusog pa sa piggibo kaining monitoring asin pagmantinir kan katoninongan sa West Philippine Sea (WPS).
Enot na man naghagad an PCG nin dugang na personnel komo parte kan 2024 target kaini sa irarom kan pitong taong recruitment plan.
Sa irarom kan nasambitan ng plano, piglalaoman na mapakol sa 37,869 an kabilogang manpower kan PCG paglaog kan 2026.
