Nagbugtak pa an Department of Transportation (DOTr) nin dugang na cashless turnstile sa Ayala asin Cubao stations kan MRT-3 tanganing mas maparekas an pagbabayad kan pamasahe gamit an mobile phones, debit, asin credit cards.
Sigun sa DOTr, an lakdang an kasimbagan sa kasuguan ni Presidente Ferdinand Marcos Jr. na bawasan an pila para sa beep cards asin single journey tickets.
Sa ngunyan, may tigsararong cashless turnstile pa sana sa lambang entrance asin exit kan iba pang istasyon kan MRT-3.
Nagpromesa an DOTr na mabugtak pa nin dugang na cashless gates sa mga masunod na aldaw.
Marurumduman na kan nakalihis na Hulyo 25, opisyal ng piglunsar an bagong cashless payment options sa MRT-3.
Kasabay kaini, pig-anunsyar man ni DICT Secretary Henry Aguda an pagkakaigwa nin libreng WI-Fi sa bilong na linya kan MRT-3.
