Duwang senador gikan sa minorya an dae nagboto pabor sa ratipikasyon kan 2026 National Budget.
Sa Viva Voce Voting, bagaman mayong aktwal na bilangan kan boto, “NO” o tutol sa Bicameral Conference Committee report an duwang senador gikan sa minorya na sinda Senators Rodante Marcoleta asin Robinhood Padilla.
Sinaysay ni Marcoleta na inaprubaran kaini an naenot na senate committee report sa pambansang pondo alagad sa irarom man kan bicam report pinadakulaan pa an pondo sa mga ayuda programs siring kan Assistance to Individuals in Crisis Situation (AICS), Tulong Panghanapbuhay sa Ating Disadvantaged/Displaced Workers (TUPAD), asin Medical Assistance to Indigent and Financially Incapacitated Patients Program (MAIFIP).
Inapod man kaini na recklessness an pagbabalik kan unprogrammed fund na nilangkawan pa sa P243.4 billion.
Mantang si Padilla man an natuyaw na igwa pa man dae malinaw sa mga ayuda programs asin an pagigin Manila Centric kan budget dawa na sadiri sana an sa Mindanao na nasa 15% sana kan pambansang pondo.
Kun siring soboot an mangyayari, sayang sana an paghihinguha asin pagsasakit sa deliberasyon sa budget asin mababalewala an pagpupuyat ni Senator Win Gatchalian para sa pagbusisi kan budget.
Mientrastanto, dae na man nakatinta sa Bicameral Conference Committee report sinda Senators Imee Marcos, Bong Go, asin Bato Dela Rosa.
Sinaysay ni Gatchalian na dae na nahalat an mga ini tangani na matintaan an bicam report huli ta nagpirma na an pirang mga myembro asin kaipuhan na nindang maratipikaran kan nakalihis na aldaw an pambansang pondo.
Makalihis na ma-ratify isusumiter na man sa opisina kan Presidente an 2026 General Appropriations Bill. Nag-adjourn na man kan nakalihis na Lunes an sesyon sa Senado asin liwat na mabalik sa January 26, 2026.
