Aram baya nindo mga ka-Bombo, sarong kakaibang “eleksiyon” an kina-ogmahan ngunyan kan sarong komunidad sa Somerville, Massachusetts, U.S.A.
An nasambitan ng eleksiyon para sa posisyon na “Bike Path Mayor” an bakong mga tao an kandidato, kundi mga ikos na may kanya-kanyang campaign sign asin political party.
An eleksiyon an nasa pag-ultanan sana kaidto kan magkaribal na ikos na sinda Berry, an “incumbent”, asin man an saiyang kalaban na si Orange Cat.
Alagad dae nag haloy, nagdakol na an mga kandidatong ikos. Nagpuon an gabos kan magbugtak an fur mom ni Berry na si Mallory Bissett nin sarong placard sa bike path tangani ipaaram na bakong ikos na ligaw si Berry asin dae dapat pag kuanon.
Kina-ogmahan an placard na garu sarong campaign poster. Dae man naghaloy, sumulpot na an mga campaign sign para sa iba pang ikos.
Mayor na kalaban ni Berry si “Orange Cat” na nagdadalagan sa irarom kan “Catalyst Party”. Kabali man sa mga “kandidato” iyo si Pirate na may platapormang “More Cat Food For All” asin si Freya kan “Com-meow-nist Party”.
Tulos na tinangkilik kan komunidad an ideya. Nagbugtak na man an ibang residente kan mga campaign sign para sa saindang mga ataman, kabali na an sarong padis kan ido.
Nagkaigwa pa nin bahagyang “iskandalo” kan mawara an campaign sign ni Berry, alagad naibalik man ini makalihis an pirang oras.
Tangani magin mas opisyal an kunwaring halalan, may sarong placard na igwa nin QR code kun saen pwedeng bumoto. An “botohan” an masarado sa September 5.
Para sa mga residente, an kaganapang ini an sarong “meow-velous” o marahay na paagi tangani magkasaro asin magtao nin kaogmahan sa saindang komunidad.
