(UPDATE) NAGA CITY- Tinawan doon kan 9th Infantry Division, Philippine Army na sarong lehitimong operasyon an nangyaring engkwentro sa barangay Itok, Capalonga, Camarines Norte suodma.
Sa entrevista kan Bombo Radyo Naga ki Capt. Ronnie Madriñan hale sa Division of Public Affairs Office (DPAO) kan 9ID, sinaysay kaini na lehitimo an naging operasyon kan mga kabuhan kan 9th Infantry Batallion na nagresulta sa sarong engkwentro laban sa limang pigtutubudang miyembro kan rebeldeng New People’s Army (NPA) sa nasambitang lugar.
Ini an kasimbagan kan 9ID manungod sa sinasabing sarong sibilyan suboot asin bakong miyembro kan makawalang grupo an nagadan sa engkwentro.
Sigon ki Madriñan, mismong an mga residente hale sa barangay an nagpaabot nin impormasyon sa mga militar manungod sa presensya kan mga rebelde.
Apwera man sa bangkay kan dae pa pinangaranang nagadan sa engkwentro, narekober man an mga bala, badil asin subersibong mga dokomento.
Marurumduman na nakaengkwentro kan mga militar an limang miyembro kan rebeldeng NPA asin naghaloy nin haros limang minuto an riribayan nin putok sa pag-ultanan kan duwang grupo.
