NAGA CITY – Nag-apelar an environmental health group na EcoWaste Coalition na gibuhong “zero waste and toxics-free” an Brigada Eskwela na pupuonan na sa Hulyo 22.
Sigun sa EcoWaste Coalition, dapat likayan na an pagdadara nin single-use plastics sa eskwelahan siring kan tubig sa plastic bottles asin pagkakan na nakalaog sa polystyrene foam containers.
Kahagadan man ninda an paggamit nin plant-based materials sa paglilinig asin an pag-likay sa paggamit nin polyvinyl chloride asin plastic tarpaulins.
Pagirumdom pa kan grupo an tamang segregation sa basura asin mahigot na pagbabawal sa pagsusulo kaini.
Dae na man maggamit nin hazardous substances sa paglilinig na peligro sa salud kan tao siring kan oxalic asin muriatic acid.
Apelar pa kan mga ini na pagayunon an aterials recovery facility kan eskwelahan asin an paggamit nin mga certified lead-safe na pintura apwera sa iba pa.
