NAGA CITY- Nagpakol sa kabilugang P3 million an nagin kita sa pigkundusir na Feria De Camarines Featuring Uma Usbong.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na kung ikukumparar sa nagin kita kan nakalihis na taon na nagpakol sana sa P1.7 million mas nahilingan soboot nin paglangkaw ngunyan na taong 2025.
Sigun ki Ablan, nahihiling nindang rason digde an pagkakaigwa nin inobasyon asin mas orog na nagin magayon an mga produkto na pigtatangro kan farmer entrepreneur.
Dugang pa kan opisyal, mas nagin marhay an kalidad kan produkto na nagpapahiling na dae nasayang an asistensiya o investment na gikan sa gobyerno.
Paliwanag kaya ni Ablan, an anuman na pigtataong tabang kan gobierno kinakaipuhan na mahilingan nin return of investment tangnaing magtalubo asin orog na mag-uswag an kita na makakatabang man sa mga masunod pang programa na ipapautob kan National government.
Apwera digde, bistado naman soboot an brand na Feria De Camarines kun kaya mas nagdakol an nagtatangkilik sa mga produkto na gibo kan mga MSMEs gikan sa Camarines Sur.
Mientrastanto, nagpakol man sa nasa 86 na farmer entrepreneur an nagpartisipar sa nasambitan ng aktibidad.
Sa ngunyan, pig-enkaminar na sana ni Ablan an publiko na i-apresyar an gibo kan mga sararadit na negosyante tanganing mas orog na magtalubo pa ini.
