NAGA CITY- Matrayumpo an nagin filing kan certificate of candidacy kan nakalihis na Oktubre 1 hasta Oktobre 8 sa syudad nin Naga.
Sa nagin entrevista kan Bombo Radyo Naga ki Atty. Maico Julia an Comelec Officer kan Comelec Naga, pigsaysay kaini na nagin matrayumpo an filing kan COC kan mga nakalihis na aldaw.
Sigun digdi, natapos an filing pasado alas 4:56 nin pagkahapon kasuudma aldaw nin Martes, Oktobre 9 2025. Sa presente igwa nin limang nagfile nin COC sa pagka Mayor, 5 man sa Vice Mayor asin 25 sa Councilor.
Sigun pa ki Julia, namatean an pagdagsa kan mga tawo sa saindang opisina kan nagfile si Former Vp asin Atty. Leni kan sabado magin man kan nag file si Nonoy Magtuto asin Tato Mendoza , huli ta nagdara soboot ini nin dakol na supporters.
Sa ngunyan, tapos na an filing kan COC kan mga kandidato kaya dadarahon na an mga ini sa provincial office mantang an mga COC sa Camarines Sur an dadarahon naman sa Law Department asin digdi ini rerepasuhon kun tama an mga entries.
Makalihis kaini, mapuon na man magpreparar nin mga listahan para sa checking asin ipa-finalize an mga ini tanganing makapag print na kan mga balota.
Mientrastanto, mayo man soboot nairehistong pre-mature campaigning kan nakalihis na eleksyon alagad pwede naman soboot an mga ining mag pabisto asin maglibot-libot huli ta dae paman ini cover kan mga rules.
Katakod digdi, enkaso na magpuon na an campaign period sa Marso 28 para sa lokal, mantang february 11 man sa National, kinakaipuhan magsunod an mga aspirante sa mga rules, sizes, expenses, asin sa lugar kun sain mapadukot nin mga campaign materials asin iba pa.
Sa ngunyan, piglinaw man ni Julia na libre pa an mga ini na maglaag kan saindang mga info materials.
Pangapudan na sana kan opisyal sa mga makandidato na magsunod sa mga rules and regulations kan Comelec sa campaigning asin sa mga botante man na siertuhon soboot na bistuhon maray an saindang mga bobotohan tanganing makapili nin kwalipikado sa serbisyo asin maserbe sa banwaan.
