NAGA CITY – Isasagibo kan Barangay Concepcion Pequeña sa siyudad nin Naga an force evacuation enkaso man na magkusog an pag-uran dara kan bagyong Uwan.
Sa entrevista kan Bombo Radyo Naga ki Juan Francis Mendoza, Barangay Kapitan kan nasambitan ng barangay, sinaysay kaini na kasuodma pa soboot sinda nagpagiromdom asin nagpatanid sa mga residentes kan saindang barangay sa mga dapat na gibuhon asin kun saen an mga evacuation centers ninda.
Dugang pa kaini, an gigibuhon man nindang evacuation centers iyo an Barangay Hall, an Immaculate Concepcion Parish, asin an Major Seminary, Concepcion National High School, magin an Super Health Center na sainda man na ipapaaram ki Mayor Leni Robredo kun pwedeng magin saro pa sa mga evacuation centers.
Sigun pa ki Mendoza, na sa presente dae pa soboot ninda aram kun pirang indibidwal o pamilya an ma-ebakwar huli man ta kun marurumduman, kan mga nakalihis na bagyo halos dikit sana an numero kan pamilyang nag-ebakwar sa saindang mga evacuation centers, alagad kun manunutaran dakula an bagyo kaya man piglalaoman man ninda an mga tawong nasa low lying areas an mapasiring sa mga evacuation centers tanganing mag-ebakwar.
Pigheras man kan opisyal na sigun sa alkalde kan siyudad saaga sinda masagibo kan force evacuation.
Mientrastanto, pigtawan-duon pa ni Mendoza na preparado na man an relief goods kan saindang barangay, kun saen yaon na sa mga evacuation centers an mga pagkakan tanganing pag-abot kan mga nag-ebakwar igwa na soboot sindang maitataong relief goods.
Sa ngunyan, pagiromdom na sana kan opisyal sa gabos na lugod magsunod sa mga ipapautob kan gobyerno tanganing makalikay sa anuman na pwedeng mangyari sa kasagsagan kan bagyo.
