Kampante si Nicholas Kaufman na nakaresebir nin marhay na pagtrato si dating Presidente Rodrigo Duterte mantang nasa laog kan International Criminal Court (ICC) Detention Centre.
Sa sarong entrevista, pigtawan-duon kan lead counsel kan dating Presidente na marhay an saiyang kamugtakan sa laog kan pasilidad, sa ibong kan saiyang edad.
Regular man soboot na nagsasalang sa pagsusuri an salud kan dating Presidente, mantang pigrerepaso man an saiyang health records kada matapos an 120 aldaw.
Enot na man na kinumpirmar ni Kaufman na naresebir na kan Defense team an kopya kan pagsusuri na binilog kan independent medical team na nasugong magsuri sa kamugtakan kan Presidente asin aramon kun kaya kaining mag-atendir asin manindugan mantang pigdadangog an saiyang kaso.
Pig-ako na man kan defense panel na sa laog kan pasilidad iseselebrar kan dating Presidente an kapaskuhan, sa ibong kan saindang plano na liwat magsunad nin petisyon para sa saiyang paramientras na paglaya, makalihis na maresebir an kopya kan report.
Mientrastanto, liwat man na pig-enkaminar ni Kaufman an publiko na respetuhon an ICC asin respetuhon an mga procedure na pigtalaan kan international tribunal.
