Aram baya nindo mga ka-bombo, sa haros pirang bulan, an Gaîté Lyrique Theater sa Paris, France an pig-okupa kan mga homeless migrants na kaipuhan nin madadagusan mantang namamatean an winter season.
Basado sa report, nagpuon an pag-okupa sa nasambitan ng teatro kan nakalihis na December 10 kan mag-host nin sarong libredong conference na igwang titulong “Reinventing the Welcome for Refugees in France”.
Katakod kaini, an nasa 250 African migrants na nag-atender kan nasambitan ng event an nagsayuma na maghali maski pa tapos na an aktibidad.
Makalihis ini, igwa pang nag-abot nin nasa 50 migrants na mayo soboot madadagusan orog na sa panahon kan taglipot sa Paris.
Huli kaini, pig-ako kan management na kinaipuhan nindang ikanselar an mga performances hasta sa maabot na January 24 maski pa posible ining magin kawsa kan pagdeklarar nin pagkalugi kan saindang institusyon.
