Igwang pagkahadit si Senate Committee on Finance Chairman Senador Sherwin Gatchalian na mapuli sa reenacted budget an 2026 National budget kun pasagos na mapapauktaba an pag-urulay sa prosopwestong pondo.
Nabago an budget schedule huli sa kasulo na nagtama sa establisyemento kan Senado kan nakalihis na aldaw nin Domingo.
Nakatalaan kudta nang isagibo ngunyan na aldaw an period of amendments, alagad mauurong ini saaga.
Target man na maaprubaran sa ikaduwang pagbasa an prosopwestong budget sa Disyembre 3, asin an ika-tolong pagbasa sa Disyembre 9.
Nakatalaan man na gibuhon an bicameral meeting sa Disyembre 11, 12, asin 13 na ila-livestream tanganing masierto an transparency sa pagbusisi kan pondo.
Aminado si Gatchalian na dikit na an saindang timeline sa pagpasar kan pambandang pondo — orog na ta target nindang mapapirmahan sa Presidente an 2026 National Budget sa Disyembre 29.
Siring man, pigsierto kan Senador na nasa tamang dalagan pa man sinda kan saindang piglalaomang iskedyul. Mientrastanto, malatag man nin mga panundonan sinda Gatchalian asin House Appropriations Chairperson Mikaela Suansing tanganing masierto na an sulamenteng papag-urulayan sa bicameral conference iyo an mga probisyong dae napagkasunduan, asin mayong idudugang na bagong item o amyenda na dae man napag-urulayan sa plenaryo.
Obheto kaini na malikayan an anuman na pagpapalaba kan pag-urulay. Pigbuyagyag man ni Gatchalian na nagsuhestiyon an House Panel na magkaigwa nin set of rules na aprubado kan duwang kapulungan tanganing tukuyon an “do’s and don’ts” kan mga miyembro sa mismong meeting kan bicameral conference committee.
Mientrastanto, pigpaplantsa pa kan Senado an nagkapirang kumplikasyon sa prosopwestong pondo kan Department of Public Works and Highways (DPWH) katakod sa pagbawas kan dakulang budget sa saindang mga proyekto.
Siring man, nilinaw kan senador na hinali na kan Senado an gabos kan “red flag” items na nahiling sa DPWH budget.
