Pianataob kan Team Georgia an defending champion na Spain sa nagpapadagos na EuroBasket 2025.Ibinulsa kan Georgia an 14 point lead sa pagtatapos kan laban, 83-69, sa pangengenot ni Toronto Raptors forward Sandro Mamukelashvili.
Naggibo si Mamukelashvili nin all-around performance: 19 points, 7 rebounds, asin anom na assists. Nagdugang man nin 12 points an shooter na si Kamar Baldwin, kaibahan an sarong 3-pointer, pirang segundo antes matapos an 4th quarter.
Sa tindi kan depensa kan Georgia, dae nakapalag an Spain orog na sa paint area.
Nagkamada kaya an Georgia nin kabilogang 46 rebounds mantang sulamenteng 29 sana an naisimbag kan Spain.
Magin sa free throw lines, below-50% an nairehistro kan koponan kun saen sa 13 free throws na iginawad sa koponan, anom sana an nagibo kaining ilaog.
Para sa Spain, nangenot an dating NBA player na si Juancho Hernangómez na nagbulsa nin 13 points.
Kasunod kan kapangganahan, kapot na kan Georgia an 1-1 win-loss record mantang mayo pang naipapaganang laban an defending champion asin tangan an sarong kadaogan.
