Pig-iimbestigaran kan Goa Municipal Police Office an suboot bomb threat na ipinadara sa Facebook na nagkawsa nin pagkatakot sa sarong high school kan Miyerkules, Agosto 19. Tulos na nakipag-ulay an lokal na gobyerno sa mga nanonongdan na awtoridad asin ginibo an kinakaipuhan na lakdang para sa seguridad kan eskwelahan.
Sa paghampang sa mga Kagawad kan Media kay Police Captain Jeson Max F Barcenas,Annual Command Performance and Review (ACOP), sinaysay kaini an screenshot kan nasabing Facebook post asin ipinasa sa regional office asin cybercrime unit para marepaso asin mapreserbar an digital evidence enkaso mapara an post. Naghagad man nin tabang an mga otoridad sa Explosive Ordnance Disposal (EOD) asin K9 units ngani na magsagibo nin inspeksyon sa eskwelahan.
Mga alas 9 nin aga, ginibo an inspeksyon sa koordinasyon kan principal kan eskwelahan asin iba pang opisyales kan eskwelahan. Pagkatapos kan inspeksyon, negatibo sa anuman na bomba an lugar. Alagad, nagdanay an presensya kan pulis sa eskwelahan bilang pag-iingat asin para maseguro an kaligtasan kan mga estudyante asin staff.
Padagos an imbestigasyon sa Facebook account na pigtutubodan na may relasyon sa nasabing post. An mga imbestigador pigrerepaso an mga koneksyon asin impormasyon gikan sa account tanganing madeterminaran kun siisay an posibleng nasa likod kan banta. Dai pa 100 porsyento nakumpirma an identidad kan pig-iimbestigaran, alagad natipon na an mga impormasyon asin digital na ebidensya.
Nakipag-ulay man an PNP sa Municipal Social Welfare and Development (MSWD) makalihis na nasambitan an sarong indibidwal katakod kan insidente. Segun sa orolay, nakaeksperyensya suboot nin social discrimination sa eskwelahan an indibidwal na posibleng nakaapektar sa saiyang emotional state. Nagpapadagos pa an imbestigasyon ngani na madeterminaran kun sisay an tunay na autor kan huma nin bomba asin panimbagon an sisay man na makuang responsable.
