NAGA CITY – Nairehistro an 44 degrees Celsius na heat index sa CBSUA-Pili, Camarines Sur kasuudma, Abril 22, 2024.
Sa entrevista kan Bombo Radyo Naga ki Ian Neil Nuñez, officer-in-charge kan Agromet Station kan CBSUA-Pili, sinaysay kaini na mayong pinipiling aldaw an init alagad an Easterlies o an duros gikan sa sirangan an nakakadugang pa sa init asin maalinsangang panahon na namamatean.
Depende man an pagbaba kan heat index sa pagigin mapanganuron kan kalangitan, na nagpapababa sa humidity o alinsangan.
Ini man an nagpapalangkaw sa water vapor huli ta nagdadakul an convective heat transfer, alagad dai man dapat na paglingawan na an air temperature saro sa factor na nagpapalangkaw sa heat index kaya mayo soboot ining oras kun nuarin ini mababa.
Laoman man na basta panahon nin summer o tag-init, orog na sa mga bulan nin Marso hasta Mayo, talagang mainit maski na mayong El Niño.
Sa nahihiling man kan Agromet Station, nagtitinir na makusog an Easterlies o an duros gikan sa dagat nin Pasipiko, na nagtatao nin alinsangan o moisture gikan sa dagat na nagkokontribwir sa alinsangan sa bilog na Pilipinas.
Pigsambit man kaini na an saindang datos nagrerepresentar kan weather asin mga obserbasyon sa bilog na probinsya kan Camarines Sur. Dugang pa kaini, suspendido pa man giraray an klase sa CBSUA-Pili huli sa halangkaw na heat index.
Igwa naman nin Memo na pigheras an pamayuhan kan eskwelahan na nagsusugo sa paramientras na implementasyon kan online classes. Sa presente, mayo pa man sigun ki Nuñez na napapabaretang nagkaigwa nin heat stroke sa saindang eskwelahan huli sa halangkaw na heat index.
