CAMNORTE – Pigtutokan kan probinsya kan Camarines Norte an HIV/AIDS awareness katakod kan saindang pigkundusir na seminar mapadapit digdi.
Sigun ki Abel Icatlo, Museum Curator, Camarines Norte Provincial Government na obheto kan nasambitan ng aktibidad an tanganing magpalakop kan tamang impormasyon dapit sa siring na helang.
Apwera pa digdi, nahiling soboot kan saindang lado na an mga jovenes an makikinabang digdi orog na ta nanutaran sa statistics na dakulang bagay an mga nabibiktima kan siring na helang an nag-eedad puon 15-anyos hasta 25-anyos.
Nahihiling sa numerong ini asin sa siring na edad na makukusog an boot kan mga jovenes na makipagtalik tulos na nagigin kawsa kan problema.
Mientrastanto, kamawotan man ni Shanta Valenciano Baraquiel- HIV Counselor kan nasambitan ng probinsya na itukdo an siring na helang sa eskwelahan orog na ta dakulang impluwensya an pigsasabi kan mga paratukdo sa mga estudyante.
Sigun pa ki Baraquiel, mahewas na an mga ginigibo kan mga jovenes ngunyan kun kaya dapat na sa eskwelahan pa sana an aram na kan mga ini an mga dapat asin dae dapat gibuhon tanganing malikayan na magkaigwa kan siring na helang.
