IDENEKLARAR ni Pres Ferdinand Marcos Jr. an mga special non-working day sa pitong lokalidad sa nasyon tanganing matawan an mga residente nin panahon na makiiba sa mga founding, charter o fiesta celebration kan saindang mga lugar.
Sa Proclamation No. 1437, an Setyembre 21, Lunes, magiging special non-working day sa Aguinaldo, Ifugao. Minarkahan kan munisipalidad an founding anniversary kaini ngayong Domingo. Sa hiling kan Office of the Mayor, an holiday ipinanglipat sa Setyembre 21.
Nag-isyu man si Marcos nin Proclamation No. 1438 na nagdedeklara nin special non-working day sa Tayabas, Quezon, sa Martes, Setyembre 29, para sa selebrasyon kan pista kaini.
Sa Proclamation No. 1439, an Setyembre 30 idineklara man na special non-working day sa Bagabag, Nueva Vizcaya, para sa founding anniversary kan munisipalidad.
Idineklara man kan Pangulo an Oktubre 2, Biyernes, bilang special non-working day sa Dinagat Islands, sa irarom kan Proclamation No. 1440, para sa selebrasyon kan charter anniversary kaini.
Mientrastanto, idineklara man na special non-working day sa irarom kan Proclamation No. 1441 an Oktubre 5, Lunes, sa Del Gallego, Camarines Sur, bilang pagmarka kan founding anniversary kaini.
Sa irarom kan Proclamation No. 1442, an Oktubre 7 idineklara na special non-working day sa Guipos, Zamboanga del Sur, para sa 35th Araw ng Guipos sa nasabing banwaan.
Dugang pa digdi, nag-isyu man nin Proclamation No. 1443 para sa Oktubre 8, Huwebes, bilang special non-working day sa City of Koronadal, South Cotabato, sa selebrasyon kan 26th Charter Anniversary.
An gabos na proklamasyon pinirmahan kan Setyembre 15 ni Executive Secretary Ralph Recto, sa kapangyarihan ni Pangulong Marcos.
