Pinagbawalan ng karamihang miyembro ng House Committee on Justice ang pagbubukas ng kahon na naglalaman ng tax returns nina Vice President Sara Duterte at Atty. Manases Carpio matapos bumoto ang 38 miyembro laban dito.
Sa botohan nitong Miyerkules, 38 kongresista ang tumutol sa pagbubukas ng kahon habang anim lamang ang pumabor. Dahil dito, nanatiling sarado ang mga dokumentong isinumite ng Bureau of Internal Revenue (BIR) noong nakaraang linggo.
Ayon sa BIR, ang mga tax records ay maaari lamang buksan “in aid of legislation” at sa executive session, at hindi sa public hearing.
Ipinunto ni Deputy Minority Leader Rep. Chel Diokno na sapat na ang umiiral na ebidensiya upang makapag-establisa ng probable cause para sa impeachment kahit hindi buksan ang kahon, at mas mainam na ipaubaya na lamang sa Senate impeachment court ang pagpapasya kung kailan ito maaaring buksan.
Sinuportahan ito nina Deputy Speaker Rep. Janette Garin at Rep. Benny Abante, na nagsabing ang Kamara ay nagsasagawa pa lamang ng preliminary investigation at hindi pa impeachment court.
Samantala, tinuligsa ni Senior Deputy Majority Leader Rep. Lawrence Defensor ang naging desisyon at tinawag itong “betrayal of public trust,” at iginiit na tila pagtakip ito sa katotohanan.
Sa kabilang panig, sinabi ni Senior Deputy Minority Leader Sen. Leila de Lima na ang Konstitusyon ang dapat manaig kaysa sa National Internal Revenue Code, at hindi dapat maharangan ang kapangyarihan ng komite sa pagbusisi ng mga dokumento.
