Nag-file an House Prosecution Panel kan saindang pre-trial brief para sa nakatalaan na paglitis sa impeachment case, na kabali an labing 30 testigo na piglalaoman na mag-atubang sa korte. Susog sa report, an prosekusyon nagsangat man nin “reservation of right” na magsumiter nin dagdag na ebidensya o magdagdag nin mga testigo kun kinakaipuhan sa laog kan pagbista.
Sa intrevista kan Bombo Radyo Naga ki Rep. Renee Co, House Prosecution Panel, ipigheras kaini na an saindang lakdang, pinili man kan prosekusyon na dai atubangon an nagkapirang teknikal na isyu na pinalataw kan kampo kan bise presidente tanganing maibitaran an anuman na pagkaatraso asin maparikas an pagpoon kan proseso nin paglitis sa impeachment.
An pre-trial proper nakatalaan sa Hunyo 18, mantang piglalaoman na mapuon an pormal na trial sa Hulyo 6 sa Senado na iyo an maserbing impeachment court. Sa irarom kan proseso, kaipuhan an dos-tersio kan boto o 16 na boto kan mga aktibong senador tanganing makapasar nin sarong konbiksyon.
Kabale sa mga mayor na alegasyon an soboot salang paggamit kan Confidential and Intelligence Funds (CIF) asin mga iregularidad sa Statement of Assets, Liabilities, and Net Worth (SALN). Pigkokonsiderar man kan prosekusyon an isyu kan dai maipaliwanag na kayamanan bilang sarong pangenot na parte kan saindang kaso, na sabi ninda dai nakakatugma sa ipinahayag na kita asin mga pagsadiri.
Nangapudan an piskalya sa publiko na mahigot na bantayan an mga mangyayari sa senado tanganing maseguro an transparency asin accountability sa proseso. Piglalaoman man na an iba pang mga ebidensya na may relasyon sa SALN asin iba pang mga dokumento na masuporta sa kaso ipapaluwas sa maninigong yugto kan pagbista.
