NAGA CITY – Prangkang sinaysay ni Vice President Leni Robredo na may mga nahihiling siyang nagkapirang problema sa housing project para sa mga biktima kan bagyong Yolanda.
Sa paghampang ni Vice President Leni Robredo sa mga kagawad kan media, binuweltahan kaini an saiyang naenot na propwesto kan siya pa an nagkakapot kan Housing Urban and Development Coordinating Council (HUDCC) kunsaen piglalaoman soboot niya na magin katabang kan National Housing Authority (NHA) an mga local government units (LGU) na may kapasidad na mag-implimentar kan proyektong pabahay na maabot sa 17,000 housing units.
Sa paaging ini, mas magigin marikas soboot nindang matatawan nin harong an mga naapektaran kan nasambitan ng kalamidad.
Dugang pa kan bise-presidente, may problema sa nagkapirang polisiya kan NHA kunsaen dakula soboot an kontrata na solamenteng an mga triple A contractors sana an nakakapasar.
Mayo man soboot an mga ini sa mismong lokasyon kan proyekto kung kaya nagkakaigwa nin subcontract asin pwedeng masakripisyo an kalidad kan housing project.
