Malabo pa na matugutan an hurot na dugang- pasahe kan nagkapirang sektor kan transportasyon, sa ibong kan padagos na paglangkaw kan gastos sa operasyon huli sa sunod-sunod na paglangkaw kan presyo nin gasolina.
Sa sarong pahayag, pigsaysay ni Land Transportation Franchising and Regulatory Board (LTFRB) Chairman Atty. Vigor Mendoza II na basado sa saindang sa kalkulasyon, kaya pa man na saluhon kan mga transport operator an presenteng gastos.
Dugang pa kaini, dae pwedeng magdestrebwer nin fuel subsidy huli ta dae pa soboot nag-abot sa 80 US dollars kada bariles an presyo kan krudo sa pankinaban na merkado.
Alagad, pigsaysay man ni Mendoza, kun magpapadagos an paglangkaw kan presyo nin gasolina asin orog pang magagabatan an mga drayber asin operator, ikokonsiderar kan ahensya an pag-apruba sa hurot na dugang na pasahe.
Padagos soboot nindang pigbabalanse an kapakanan kan mga pasahero asin an kamugtakan kan mga drayber asin operator.
