Nagtutubod si dating Presidential Spokesperson Atty. Harry Roque na sala asin bakong makatarungan an desisyon kan International Criminal Court (ICC) na ibasura an kahagadan para sa paramientras na pagpalibre o interim release ni dating Presidente Rodrigo Roa Duterte.
Sa sarong video message, pigpaliwanag ni Roque an pirang rason kan korte sa pagsayuma sa apelar kan kampo kan dating presidente.Saro sa mga nagin batayan kan ICC an posibilidad na ginibo ni Duterte an mga paratang kontra sa saiya.
Boot sabihon, sigun ki Roque, nagtutubod an hukuman na igwang kinaaraman si Duterte sa mga akusasyong Crime Against Humanity.
Pinaka-kontrobersyal soboot sa mga basehan kan ICC an posibilidad na magdulag si FPRRD enkaso tugutan ining paramientras na mapalibre.
Nagtutubod si Roque na napasala an hukuman sa siring kaining paghusga. Dugang pa kan abogado, normal sana an nagin reaksyon kan pamilya kan dating Presidente sa insidente sa Villamor, orog na ta mayong naipahiling na warrant of arrest sa sainda.
Pigtawan duon man ni Roque na an nangyari ki Duterte maikokonsederar na kidnapping asin pagbalgar sa ley kan mga personahe kan gobierno.
Mientrastanto, susog sa report pigsaysay ni ICC-accredited lawyer Atty. Gilbert Andres, na pigpapangadyi ninda na madagos na an confirmation of charges kontra ki Duterte. Ini an kasunod kan pagsayuma kan ICC sa apelar kan kampo ni Duterte na paramientras na mapalibre an dating Presidente komo konsiderasyong makatawo.
