NAGA CITY- Ikinaugma kan nagkapirang mga namamanwaan urog na an mga residente sa banwaan nin San Jose, Camarines Sur an propwestong domestic airport na ipapakonstruhir sa nasambitang lugar.
Susog sa pahayag ni 4th District Representative Noli Fuentebella, sinaysay kaini na dakula an maitatabang kan nasambitang aeropuerto sa pagpapa-uswag kan turismo sa saindang lugar asin sa ikaapat na distrito kan probinsya.
Apwera sa ipapakonstruhir na aeropuerto sa barangay Pugay sa nasambitang banwaan, sigon ki Fuentebella, posible man na magpagibo nin seaport sa saindang lugar.
Mientrastanto, sigon man ki Department of Energy (DOE) Sec. Alfonso Cusi, plano nindang magbugtak nin terminal para sa mga gasolina tanganing masierto na an bastanteng suplay nin gasolina sa probinsya.
Pabor man sinda sa ipapakonstruhir na domestic airport huli naman ta saro suboot sa mga prayoridad kan Duterte Administration na makatao nin hanapbuhay asin mapa-uswag an sarong lugar.
Nagtutubod man an energy secretary na kun madadagos an proyekto mas makakatabang pa ini sa ikaapat na distrito kan Camarines Sur na diit-diit ng pigdadayo kan turista huli naman sa Caramoan Island.
Nakaandam man suboot an energy department na magpakonstruhir nin power-plant sa lugar kun hahagadon ini kan mga namamanwaan.
Apwera ki Cusi, nag-atendir man sa ginibong ground breaking ceremony sa nasambitang lugar si Department of Transportation (DOTr) Sec. Arthur Tugade.
