Aram baya nindo mga ka-bombo, an serial na parahabon kan mga gamit siring kan tuwalya, sapatos asin underwear sa sarong eskwelahan sa New Zealand na nag-abot na nin haros sarong taon an nakuanan nin video kun saen napag-araman na sarong ikos.
Sigun ki Marama Stewart, principal kan Apanui School sa Whakatāne, an nasambitan ng mga items an misteryosong nawawara sa eskwelahan haros sarong taon na orog na kun an mga swimming pool an ginagamit.
Katakod kaini, nag post an eskwelahan nin video sa Facebook kan madakop pa an salarain sa paagi kan security camera. An footage nagpapahiling na sarong itom na ikos an igwang piglalay na tuwalya sa playground.
Pig-kontak man kan groundskeeper kan eskwelahan an may sadiri kan ikos kun saen pigkumpirmar kaini na an saiyang araman an maikokonsederar na notorious thief.
Sa ngunyan, pig-abisuhan an mga estudyante sa nasambitan ng eskwelahan na ilaag sa mga bag an saindang mga gamit tanganing malikayan an kaparehas na mga pangyayari.
