NAGA CITY- Napauktaba an ikukundusir na tree planting activity kan Philippine Red Cross Camarines Sur Chapter huli sa maraot na panahon.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur Chapter, sinaysay kaini na an nasambitan ng aktibidad an isasagibo kuta kan nakalihis na Sabado komo pakikusumaro sa International Volunteers Day sa may parte kan siyudad nin Naga o Camarines Sur.
Alagad huli sa raot kan panahon, ini an pig-reschedule ngunyan na Disyembre o sa sunod na taon.
Sigun ki Badiola, obheto kan aktibidad na magkaigwa nin marhay asin makabuluhan na kontribusyon an saindang lado para sa kinaban.
Dugang pa kan opisyal, ipinapahiling sa aktibidad na ini na an mga volunteers igwang ginigibong mga paagi tanganing gibuhong magayon an kinaban na pig-iistaran kan mga tawo.
Siringman ipinapahiling na an anuman na kadikit na lakdang pag nagkasararo asin napuonan an matalubo asin mapapakinabangan kan mga tawo.
Sa ngunyan, pigsierto na sana ni Badiola na padagos man an saindang pagtatao nin serbisyo sa publiko sa paagi kan pagbilog nin manlaen-laen na programa.
