Padagos an impeachment trial kontra ki VP Sara Duterte sa ibong kan duwang magkasunod na petisyon na isinangat sa Korte Suprema manungod sa pinal na desisyon kan Senado Impeachment Court sa 2/3-vote threshold.
Pigsierto Impeachment Court Spokesperson Atty. Reginald Tongol na susunudon man giraray an schedule na dati nang pinaluwas kan korte, kun sain sa Lunes, Setyembre 28, liwat na i-eksamin an nakatalaan na testigo kan prosecution para sa regular direct examination asin cross examination.
Pigbibisto suboot kan korte an separadong petisyon para sa certiorari na isinangat ni Atty. Victor Rodriguez asin Atty. Ernesto Francisco, alagad obligasyon kan impeachment court na ipadagos an pinonan kaining pagbista.
Sa pag-recap, an mga petisyon naghahagad kan pagluwas nin sarong temporaryong restraining order (TRO) asin sarong status quo ante order (SQAO) tanganing maibitaran an implementasyon kan desisyon sa 2/3-vote threshold.
Segun kay Atty. Tongol na an Senate Impeachment Court mayo pang naresibe na opisyal na abiso o kopya kan mga petisyon, o anuman na direktiba hale sa korte suprema.
Basado digdi, dae suboot pwedeng maghiro an impeachment court basado sana sa bareta na igwa nang nagsangat nin petisyon tanganing kuestionon an nakaaging desisyon kan mga senador-huwes.
Sinabi man kaini na iginagalang kan Senado an hurisdiksyon asin independensya kan korte suprema.
