Dae pa bastante an suporta kan mga lehislador sa Kamara sa mga pigsunad na impeachment complaint tangani na ibusol ini asin mapasikad sa puwesto si Vice President Sara Duterte.
Ini an pig amin ni House Secretary General Reginald Velasco na sinabing anom na Kongresista pa sana na nag-indorso sa tulong impeachment complaint laban ki VP Sara an nagsusuporta digde.
Mientrastanto dae pa nakakasiguro kun madadagos pa an pagsunad nin ika-apat na impeachment.
An complaint kontra ki VP Sara, katakod kan dae tamang paggamit sa P612.5 milyong confidential funds na pinagbibilog na P500 milyon sa Office of the Vice President (OVP) asin man P112.5-M sa DepEd sa panahon kan pagtukaw kaini sa nasambitan ng ahensiya.
Kabali sa mga mayor na nagsusuporta sa tulong impeachment ang tulong Makabayan bloc solons, Akbayan Partylist Rep. Perci Cendaña.
Pighayag ni Velasco na sa presente pighahalat pa kaini an ikaapat na impeachment ki VP Sara tangani na sabay-sabay na kaining maisumiter sa opisina ni Speaker Ferdinand Martin Romualdez.
Segun pa ki Velasco, kaipuhan nin 1/3 sa kabilogang numero kan mga lehislador na nasa labi sa 300 tangani ibusol an impeachment sa House Committee on Justice asin madara sa plenaryo tangani isapinal an pagboto.
Pigsaysay pa kaini na dipisil man na abutan nin session break an nasambitan ng impeachment nin huli sa nararani na campaign period sa Pebrero.
Napag araman pa na an beripikadong reklamo kan impeachment na ipapadara sa tanggapan kan House Speaker, may 10 aldaw antes ini isumiter sa Committee on Rules mantang an Committee on Justice man an magbeberipika kun igwa nin bastante na ‘substance and form’ tangani maproseso an impeachment.
Nangangaipuhan nin 154 boto gikan sa 308 miyembro kan Kamara mantang 16 man gikan sa 30 miyembro kan Justice panel na mahimay digde.
Inihayag pa ni Velasco na haros kaya dae ganado an iba pang mga Kongresista na sumuporta sa impeachment nin huli ta siyam na aldaw na sanan kan sesyon an natatada hasta Pebrero 5 asin Pebrero 7 man an adjournment.
Nakatalaan na mag-resume liwat an sesyon sa papaabuton na Hunyo 2.
