Ipagpapadagos na an indirect talks na obhetoong magkaigwa nin pinal na kasunduan sa peace plan ni US President Donald Trump tangani wakasan na an giyera sa pag-ultanan kan Israel asin Hamas sa Gaza, na nasa ikaduwang taon na magpuon kan sumiklab kan nakalihis na Oktubre 7, 2023.
Isasagibo an nasambitan ng pag-uulay sa pag-ultanan kan mga opisyales kan Palestine asin Egypt sa Egyptian City na Sharm El-Sheik.
Sigun sa mga opisyal, nakapokus an mga isasagibong sesyon sa pagkriar kan kondisyon kabali an posibleng ribayan na nilalaomang mataong dalan sa pagpapalaya kan mga bihag na Israeli karibay kan pagpapakawara sa mga presong Palestinian.
An ikaduwang aldaw kan pag-uulay, kun saen magkakaigwa man nin shuttle meetings sa pag-ultanan kan Egyptian asin Qatari officials kaiba an mga delegasyon gikan sa Israel asin Hamas kan magkasuhay ay isasagibo kasabay kan ikaduwang anibersaryo kan sorpresang pag-atake kan Hamas sa southern Israel na nag gadan sa nasa 1,200 katao asin binihag an nasa 251 katao pasiring sa Gaza.
Sa sarong statement, kasabay kan paggirumdom sa anibersaryo kan pag-atake, nagkapirang world leaders man an nagtao nin sentimyento asin pangapudan sa pagtatapos na kan giyera.
Sinaysay ni UN Sec. Gen. Antonio Gutteres na an plano ni Trump an nagpapahiling nin sarong pagkakataon na kaipuhang samantalahon tangani matuldukan na an nasambitan ng trahedya.
Pigtawan duon man ni UK Prime Minister Keir Starmer an saiyang suporta para sa plano ni Trump pasiring sa katrangkiluhan sa Gitnang Silangan asin gigibuhon kan saindang gobyerno an gabos kan saindang makakaya sa irarom kan saindang kapangyarihan tangani mamuhay nin mapayapa kada aldaw an kada aki sa Israel siringman sa Palestine.
