Nagin marekas nin 1.8% an inflation rate o paglangkaw kan presyo kan mga premirong barakalon asin serbisyo sa nasyon kan Disyembre kan nakalihis na taon, basado sa datos kan Philippine Statistics Authority (PSA).
Sigun sa PSA, an nairehistrong inflation rate kan Disyembre mas nagrekas kumparar sa 1.5% na nairehistro kan Nobiyembre 2025 alagad mas haloy man kumparar sa 2.9% kan Disyembre 2024.
Susog sa report ni PSA Undersecretary asin National Statistician Dennis Mapa, premirong nakapag-ambag sa pagrekas kan inflation kan nakalihis na bulan an paglangkaw kan presyo kan mga pagkakan partikular na sa gulay asin produktong arina na kadakli piggagamit sa food consumption kasagsagan kan holiday kan Disyembre.
Nakaapektar man digde an mga nagtamang makukusog na bagyo sa nasyon kan bulan nin Nobiyembre na nakaapektar sa mga produktong gulay orog na sa mga probinsiya sa luwas kan National Capital Region.
Naglalaom man an PSA chief na an paglangkaw kan presyo sa nasambitan na mga produkto an seasonal o paramientras sana asin mapuon magbaba ngunyan na Enero.
Ipigpaliwanag man ni USec. Mapa na an nairehistrong 1.7% na average inflation rate kan 2025 am pinakahababa puon kan 2016.
An 2025 annual average inflation laog sa target kan gobierno na 2% hasta 4%.
