Pormal nang pighagad kan defense team ni dating Presidente Rodrigo Duterte sa International Criminal Court (ICC) an interim release kan dating Presidente huli sa haloy na soboot pagpauktaba asin dae maresolbarang logistical issues sa pagsuri sa kakayanan kaining maghampang sa paglilitis.
Sigun sa depensa sa pangengenot ni Atty. Nicholas Kaufman, pigbisto ninda an paghihingoa kan Registry sa pagpepreparar kan redacted materials para sa konsiderasyon kan Pre-Trial Chamber.
Alagad, pughurot kan depensa na an isyu sa salud kan dating Presidente, naenot na nindang pigrani antes pa man an saiyang inisyal na paghampang asin duwang request na man para sa status conference sa sarong “considerable time” an saindang pigsumiter tanganing masimbagan an isyu, bagay na tinutuloan man kan kampo kan prosekusyon.
Pighurot man kan depensa na ipinagpauktaba nang mayong kasiertuhan an confirmation of charges, sa ibong pa kan naenot ng sugo kan Pre-Trial Chamber para sa halipot na adjournment sana.
Pigrason man kan depensa an logistical issues na tinukoy kan Registry na pwedeng magpahaloy soboot sa paglilitis asin an pagkauktabang ini an nagsusuporta sa kaso para sa provisional release kan dating Presidente.
Nagrekomenda man an depensa nin dugang na kondisyon tanganing masimbagan an nagkapirang pagkahadit sa posibleng paglaya kan dating Presidente, bagay na dae naiba o na-redact sa filing.
Dapat man soboot dae magtinir sa ICC detention facility an dating Presidente mantang pigsasagibo an proceedings sa saiyang salud orog na asin piglalaomang mahaloy ini.
Kaya dapat na soboot tugotan an interim release kan dating president sa orog na marekas na panahon huli ta bako ng reasonable an padagos na pagkulong sa dating president.
Pigsierto man kan depensa na dae makakaapektar an pagpapalibre ki Duterte sa nagpapadagos na paglilitis.
Naireport man na an host country o maresebir na nasyon sa dating president para sa saiyang interim release an nagtugot na makikipagtabangan sa Korte kaibahan na an pag-facilitate sa anuman na procedures na kaipuhan kan Pre-trial chamber.
Sa presente, mayo pang inisyunhg ruling an ICC sa interim release request asin presenteng nakabinbin an confirmation of charges makalihis hagadon kan depensa na i-adjourn indefinitely an paglilitis huli ta nakakaeksperyensiya soboot an dating president nin cognitive impairment na makakaapektar sa saiyang kakayanang maghampang sa paglilitis.
