Pigdakop kan Iran an duwang barko sa Strait of Hormuz kan Miyerkules, segun sa semi-opisyal na Tasnim News Agency, sa tahaw kan padagos na tensyon sa rehiyon asin an bakong malinaw na estado kan negosasyon sa ceasefire.
An Islamic Revolutionary Guards Corps pigbabareta na inagaw an duwang barko huli sa soboot mga pagbalga sa kadagatan. Dinara sinda sa baybayon kan Iran.
Ini an pinakaenot na report nin aktuwal na pag-agaw nin sarong barko poon kan magputok an giyera.
Dugang, an sarong ahensya sa seguridad sa dagat kan Britania nag report na tolo pang barko an tinamaan nin badil sa agihan nin langis, na saro sa pinakamahalagang ruta nin barko sa kinaban.
Sa tahaw kan kariribokan, si Presidente Donald Trump kan Estados Unidos nagsabi na an sarong planong pag-atake sa Iran temporaryong pinundo pagkatapos na an mga tagapag-ultanan kan Pakistan naghagad kaini, dawa ngani dai pa malinaw kun nuarin mabalik an orolay sa katoninongan.
Alagad, nag-insistir si Trump sa padagos na presensya kan pagharang kan U.S. naval laban sa mga barko kan Iran.
Sinabi kan Iran na pigkokonsiderar kaini an pagharang na sarong “akto nin giyera” asin nagpatanid na dai kaini bubuksan an Strait of Hormuz sagkod na nagpapadagos an soboot pangigipit kan Amerika.
Apwera pa kaini, nagkapirang putok nin badil an naireport hale sa nagkapirang barko sa strait, kabale na an mga container ship na suboot inatake mantang nag-aagi sa lugar.
Mayo man nin nairehistrong casualty sa mga insidente.
Mientrastanto, an direksyon kan orolay sa katoninongan sa Islamabad nagtitinir na bakong malinaw pakatapos na an sarong piglalaoman na pagtiripon sa pag-ultanan kan mga delegasyon kan Estados Unidos asin Iran dai natapos, sa tahaw kan padagos na iriwal manungod sa nuclear kan Tehran asin kontrol kan Strait of Hormuz.
