Sarong korte sa Ireland an nagtalaga nin sarong guardian para sa sarong paraoma na ipinano an haros gabos kan saiyang kwarta sa mga nagtitios, makalihis soboot ining sabihan kan diyos na mapapasiring ini sa langit kun ini an saiyang gigibuhon.
Sigun sa mga report, ipinagpabakal kan paraoma, na nasa edad 40 an saiyang ari-arian sa kantidad na €600,000 (katampad kan haros P40 milyon).
Sa laog sana kan nagkapirang semana, labi kabanga na kaini, o poco mas o menos €350,000 (halos P23.3 milyon), an naipanao na kaini.
Kaibahan sa saiyang mga ginibo, an pagtao kan €1,000 cash (halos P66,570) sa sarong babaeng palaboy.
Huli sa rekas kan pagluwas kan kwarta sa saiyang bank account, nahahadit an Health Service Executive kan Ireland asin dinara an kaso sa korte.
Hinagad ninda an pagtatalaga kan sarong “guardian ad litem”, sarong independent na tawo na itatalaga kan korte tanganing protehiran an interes kan paraoma gikan sa saiyang sadiri asin sa saiyang labi na pamumudmod kan kwarta.
Sinaysay sa korte na nagtutubod an paraoma na an pagtatao kan gabos kan saiyang yaman iyo an sulamenteng paagi tanganing makaabot ini sa langit.
Huli sa saiyang mga pahayag, nagtugot an korte na magtalaga kan sarong guardian.
Liwat dadangugon an kaso sa bulan nin Setyembre, kun saen ipinagsugo kan korte na dae muna ini isapubliko an pagkakakilanlan kan paraoma.
An kasong inian nagbubukas kan diskusyon mapadapit sa kun nuarin an pagigin bukas-palad an nagigin rason rason para sa paghahadit sa mental health kan sarong tawo.
